చర్విత చర్వణాలు
కనురెప్పల చాటున అనుభవాలహేల
చివురుటాకుల చిరుగాలి
కురులను రేపితే ప్రేమగా
సరిదిద్దిన అనుబంధం
భాస్కరుని వేడి కిరణాలు
మోముని కందిస్తే
చేరుమాలు తో సేద దీర్చిన అనురాగం
వెన్నెల కిరణాలు నిలువెల్లా మెరిపిస్తే
తన్మయత్వంతో మైమరిచి మరుల
చూపుల మెరుపులు కురిపించిన ఇష్టం
విద్యుత్ లేదని విసుగుచెందితే
నా విద్యుల్లత నీవే అన్న వైనం
నిలువెల్ల అల్లుకున్ననీ మోహం
వ్యాహాళి లోవర్షపు ధారల లో
తడిసిన అందాలకు గొడుగు
పట్టినట్లే పట్టి తడిసిన అందాలకు
దోసిళ్లు పట్టిన గడుసుతనం
శీతల రాత్రుల పరిష్వంగాలు
తెల్లవారనీయని కాంక్షలు
ఆరారు ఋతువుల కు అభినివేశాలు
అందాలు కరిగినా ఆత్మలు విడిపోయినా
మనో యవనిక పై అహర్నిశలు
కదలాడే ఆనంద వీచికలు
సాంధ్రత నిండిన సంసారాలు
శతాబ్దాలు గడిచినా పునర్చణాలు
చర్విత చర్వణాలు
కామెంట్లు లేవు:
కామెంట్ను పోస్ట్ చేయండి